Generela - Reunificazion a pe zot

Nostes Unions

Liams linguistics

Pruma plata

Les noveles

Articui

Reunificazion a pe zot

30-12-2009

Al é oramai passé plu de doi agn dal referendum, pro chel che la jent de Fodom y de Ampez à ghiré a gran maioranza la reunificazion con les autres valedes ladines. L resultat referendar à dessegur endò endespré fora la coscienza ladina y le sentiment de unité, cossa che an à ence podù vedei a Desproch ai 20 de setember 2009 en gaujion dla defileda a recordanza dl aniversar dle veres dl 1809. Te chesta ocajion à i ladins desmostré che ei se sent liés storicamenter y culturalmenter al Tirol.

La ligreza fova grana de otober dl 2007 con l resultat referendar sensazional.

L iter referendar é chiet tl Parlament talian y al moment n´él degunes forzes politiches che à dret prescia y vueia da l mené inant. L raprejentant dla SVP Karl Zeller à enjigné ca 3 dessegns de lege che reverda la chestion ladina, ma al ne é nia ciamò vegnù afrida da i prejenté tla comiscion costituzionala de chela che al fej ence pert.

L comité referendar y l´Union Generela à fat recurs a la Court Europeica per sforzé l Stat Talian da traté finalmenter la chestion referendara desche prevedù da la costituzion. Chest recurs é ence vegnù firmé dai ombolc da Fodom y Col. L ombolt d´Ampez ne à nia abù l coraje da sostegnì chest recurs; en plu ne à el nience volù che la chestion referendara vegne touta su tl statut nuef de comun. Chest gran bazilé da pert de n raprejentant politich che se dijova dant les lites a una con l referendum à descedé na gran delujion da pert dla popolazion de souramont.

En plu él ciamò da enjonté che pro la ultima enconteda anter i presidenc Durnwalder y Dellai con l govern talian él vegnù fat fora che la region mess ti dé contribuc ai comuns confinanc con la region sun la basa de projec che vegn prejentés. L fat da ti dé n finanziament a chisc comuns pò ester de un n vers dessegur n fat positif. Ma chesta cossa é bonamenter ence da vedei desche tentatif da destó les popolazions da la volonté da baraté confins. Al é da speré che i aministradours di comuns de Souramont ne se lasce nia adorbé da na empermetuda melsogura de contribuc, ence sce l pericul é gran. I vedaron sce la popolazion da Souramont tegn pro sia ghiranza o sce la speranza de n sostegn finanziar, bonamenter limité tl temp, lascia destudé plan, plan vigni sentiment de liam interladin.

Sun l ciamp politich él vegnù arjont de biei resultac entratant l ann passé. Daniela Templari de La Plie de Fodom, presidenta dla Union di Ladins da Fodom é vegnuda liteda te comun y tla Provinzia de Belun, olàche ela fej pert desche assesoura dl govern provinzial. En plu él ence vegnù lité Herbert Dorfmann, n gran sostegnidour dla mendranza ladina, tl Parlament Europeich.

N fat emportant podessa ence ester chel che Galan, president dla Region Venet, gran nemich dla reunificazion, ne pò nia plu se prejenté a les proscimes lites. L candidat nuef sarà Zaia dla Lega, enfin a sen minister per l'agricoltura.

L'Union Generela y l comité referendar á tout su contac con deplù forzes politiches locales per ciafé sostegn a les ghiranzes dla popolazion ladina. Chisc contac jirà inant y proscimamenter él anter l auter ence prevedù na enconteda con l Landeshauptmann de Tirol, Platter.
I governs dl Tirol, de Südtirol y dl Trentin à fat fora da laoré deberieda desche region europeica.Te chest contest speronse che la Lia di Comuns Ladins sostegne na ghiranza vedla dai comuns d´Ampez, Col y Fodom, che é chela da podei vegnì conscidrés finalmenter pert dla Euregio Tirol.

Nos speron che la Lega y la SVP porte inant nosc enteresc a Roma desche al nes é vegnù empermetù, ence sce nos messon tres ciamò constaté che pertes de nosta mendranza y de nosc raprejentanc politics arfera vigni sostegn politich a la reunificazion con de vigni sort de vertoles, poures y fauzes profezies. Enfin a che i maiours rems (enciamps, empedimenc) vegn da pert ladina saràl rie da arjonje chest travert che é fondamental per nosta mendranza.

Sen é la politica che à la parola y sce la ghiranza dla maioranza dla popolazion vegn respeteda messessa ester la resposta clera y nia stenteda.
L´Union Generela jirà inant con sies ativités che à ence desche travert da mioré y aumenté i contac anter duc i ladins, ence chi che viv fora dles valedes ladines per mantegnì inant nost patrimone cultural y linguistich.

A duc canc Ves aodonse truepa ligreza y fortuna per l ann 2010.

Marco Pizzinini
Vizepresident dla Union Generela