|
Enconteda con Antonio Frena |
|
|
|
|
22-10-2009 |
 Al é volonté dla Union Generela y di Comités Referendars da tò su contac con duc i movimenc politics che se à declaré da sostegnì la ghiranza di ladins da Souramont da ruvé endò pro la Region Trentin-Südtirol. Perchel él sté te chest contest ai 21.10.09 a Bulsan na enconteda anter l president provinzial dl "Partito Democratico" (PD), Antonio Frena, che à raijes a Col de Santa Lùzia, l vizepresident dla UGLD Marco Pizzinini, Ivan Lezuo y Oscar Troi dl Comité Referendar da Souramont.
Al é vegnù metù sun meisa deplù chestions ciaudes che reverda la popolazion dles 5 valedes ladines. Antonio Frena é dret informé sun duc i argomenc che é vegnus tratés y el à ence desmostré na gran desponibelté da sostegnì nostes ghiranzes nia demé a livel provinzial, ma ence a livel nazional. Chesta cossa é dret emportanta ciodì che l iter aministratif per porté inant la ghiranza dl referendum é praticamenter chiet a Roma. Sen vuelel ester parlamentars, unfat de cie moviment politich, che se festidieia y porta inant la cossa.
Canche al ti vegnirà damané al Consei Provinzial de Bulsan, sce el é a una per la reunificazion di trei comuns a Südtirol saràl l PD dessegur da nosta pert. A. Frena s´à laprò ciamò empermetù che el proarà da sensibilisé ence i raprejentanc de sie partì tl Parlament a Roma per les ghiranzes dla mendranza ladina.
Frena ne é nia dret a una con l daz sun i joufs dolomitics, ciodi che do sia minonga ne portarà chesta cossa bonamenter nia a n arbassament dl trafich. El é ence daldut contrar che i ladins vegne tratés desche turisc' can che ei mess passé per i joufs per laour o per d'autri debujegns.
A la fin él vegnù fat fora da romagne en contat per podei laoré adum tl davegní te na maniera plu clera y efizienta.
|
Les noveles 
Sun chesta plata ciafeise n grum de informazions sun l lingaz scrit unifiché, ladin standard o ladin dolomitan. 
Strumenc linguistics on-line. Clican sun la imaja podeise ruvé permez.