I Ladins con crousc a Baissiston

Jent da dutes les valedes ladines à renové ence chest ann sia devozion a la Madona di Dolours tolan pert al pelegrinaje endrezé via da l’Union Generela y dal Decanat dla Val Badia. Al é sté n pue demanco “cornisc” chest ann al pelegrinaje di ladins foran Baissiston. Al ne fova deguna mujiga a tò ite i fedei ruvés su da la Via Crucis o da i acompagné fora per l plaz, y i ladins che se à trat ite l guant fova dassen biei, ma al ne nen fova nia n mudlon. Do messa ne fòvel deguna mostra, no referac o esposizions, desche ti ultims agn, canche l priour Pere Lino Pacchin nes ova “usé via” a troé colafora. Ma valch outa con na cornisc plu scempla l cheder someia ence plu bel!

La Via Crucis

N mudl de ladins se à abiné ence chest ann l’ultima domenia de setember, desche al fova per tradizion, a prié la Madona de Baissiston, y trueps é ruvés al Santuar a pe, pian via ja bonora da Mont de Vich o dantmesdì da Neva Todescia, dal Mesc Kehr olàche al met man la Via Crucis che l’Union di Ladins de Fascia à renové y rencuré ti agn passés con l deidament di Schützen y dl Comun de Neva. Stazion do stazion, la presidenta de l’Union Generela Elsa Zardini, Silvano Ploner de Fascia, Daniela Templari de Fodom y Manuela Piazza de Gherdeina, adum a Pere Giuseppe Zampiva dla claustra de Baissiston y Piergiorgio con la bandiera ladina à acompagné duc i pelegrins. I fedei, ruvés te na gran cumpeida, cis da la Val Badia, à fat rondenì l son dles orazions per ladin sun l bel percurs che se dejouj anter l bosch.

L dantmesdì

Foran Baissiston fòvel tenù su chest ann valch de mezmesdì, endrezé dal conseier dl’Union di Ladins de Fascia Ermanno Winterle: pan con de bon ciajuel da Ciampedel o con marmeleda o zuchelada, n got de vin “de chel bon di frés” o de ega o aranciada; n bocon scempl, da pelegrins, ma dassen aprijé per se remete do la streda fata a pe, dant de se strenje duc adum entourn auté.

Na bela messa ofizieda dal Degan Siur Franz Sottara y cianteda dai Kyrios

La messa alalergia zelebreda dal Degan dla Val Badia Siur Franz Sottara, adum al priour Pere Lino y a Pere Giuseppe, é vegnuda viventeda da les beliscimes oujes dl Cor Kyrios, che do avei cianté l “Salve Regina” tla capela dla Madona, à compagné la zelebrazion liturgica con toc per ingleis, todesch, talian y ladin.Te sia bela perdica per ladin, à siour Franz Sottara, porté dant a la Madona i problems, i cruzes y les deblezes de duc i ladins, che é i medems de n mudl de jent encuei: ciases olàche an ne se rejona nia, genitours che pensa massa demé al laour y ai scioldi, fis lascés da soui con si juesc y che se lascia enorbì da somesc fauc, vedli desmentiés. Dut chest à i ladins metù ciamò na outa tles mans dla Madona, mans granes, desche cheles dla figura dla Madona tl santuar de San Ojuep Freinademetz a Oies, bones de tò ite dutes nostes speranzes y nosc patimenc, y de i porté dant al Signour Idie, acioche al nes deide a nes tré te n cianton la fé y duc i valours che à dagnora caraterisé la storia de nosta jent.

comentars

Scriv

Chier